“هناك بعض الأوقات التي قد لا تتناسب فيها العقول الكبيرة مع المناصب الكبيرة في قطاع ما من قطاعات الأعمال المتميزة”.

هكذا صرح الرئيس التنفيذي لشركة Careem، والشريك المؤسس لها عقب قيام الشركة بطرد م. وائل الفخراني، بجملة شديدة الغموض ولكنها توحي بالكثير، وذلك عقب واقعة هزت قطاعي التقنية وخدمات النقل الجماعي، وأثارت حالة حالة كبرى من الجدل، والشد والجذب مع لجوء م. الفخراني لساحات القضاء جراء ما حدث له من إهانة.

اولا مين هو وائل الفخراني؟

ده واحد من اشهر رواد الاعمال في الشرق الاوسط، اخر منصب ليه كان “Managing Director Egypt & Senior Vice President Governments Relations For CAREEM” و قبلها كان “”Google regional business lead-middle east and africa” و صاحب نظرية “The discomfort of the comfort zone”
و مشهور قوي و ليه شعبيه في مجاله جدا و محبوب من ناس كتير.

للي ميعرفش اللي حصل باختصار ساب جوجل و اشتغل في كريم و كان متحمس قوي و كتب مقال عن ايه اللي خلاه يسيب جوجل و يروح يشتغل في Start Up و بعد 6 اشهر للأسف كريم اعلنت انه استقال لكن هو قال انا اطردت و بطريقة وحشة قوي !!

هنا بقي 8 دروس تستفيدها من واقعة طرد وائل الفخراني:

1- اسمع كلام الست الوالده: لأنه في سنه من السنين طلع في TEDEX و قال انا هقول حاجة امي قلتلي متقولهاش عشان الحسد و هي “انا اسعد واحد في شغلي في مصر” و واضح ان العين صابت الحجر و الوالده كان عندها حكمه و بعد نظر.

2- مرفود و افتخر: الحقيقة رفد وائل ده في صالحنا جميعا، لأن زمان الواحد لما يترفد كانت الناس بتشوفه فاشل او مش ناجح و اي كلام كده و حتي لو معاه حق محدش هيقول علي الشركة غلطانة و خصوصا لو في انتريفيو، لكن دلوقتي خلاص انجح الناجحين اترفد .. الحاجز اتكسر يابني.. اللي هو عادي يعني بتحصل..و قول انا اترفدت عشان عندي وجهة نظر.. ارفع راسك فوق انت مرفود.

3- مفيش شركة بتيقي علي حد: اهو الراجل بعد كل اللي عمله للشركة و حبه ليها، اترفد لأ و كمان زي ما بيقول بطريقة وحشة! المصلحة هي اللي بتحكم… اشتغل عشان نفسك و بس.

4- يا عزيزي الدنيا مليانة Ups & Downs : يوم ليك و يوم عليك و ده حال الدنيا، درب نفسك علي تقبل الازمات و انك ازاي تطلع منها اقوي من الاول.

5- انك تدرب نفسك علي نظرية “The discomfort of the comfort zone” و يبقي عندك مرونة: وائل راح شركات كتير و قعد و ساب و ساب و قعد الراجل خلاص مبقاش فيه حاجة بتكسره و علي الاقل حتي لو زعل مش هيبقي زي زعل واحد بقاله 20 سنة في نفس الشركة و لما كبر استغنوا عن خدماته!! و ده لا يتعارض مع فكرة الولاء للشركة، لأن الولاء انك طول ما انت فيها تبقي مخلص في اداءك و علي فكرة دي مش اول مرة وائل يترفد قبل كده حصلت بردوا عشان هو كان عنده مبدأ معين يتعارض مع صاحب الشركة اللي كان بيشتغل فيها، و بعدها عادي جدا راح لGoogle و بقي المدير.

6- امن نفسك: وائل عمل لنفسه تسويق حلو قوي عن طريق كريم، هو الراجل كان كده كده معروف من غير كريم بس في وسط مجاله، عن طريق كريم بقي اتعرف في كل المجالات و بقي في Icon، فهو صحيح سابها لكن سابها متصيت و حاطط رجل و علي رجل.

7- اللي تغلبه اللعبه: كان ممكن بسهوله يسكت لما الشركة قالت انه قدم استقالته، لكن الراجل ده عارف مكانته كويس و كتب علي تويتر انا اطردت، و ده سبب ان فيه ناس كتير مسحت Careem Application

8- اخر حاجهّ!! اشتغل جامد و اتعلم قوي: وائل موصلش للمكانه دي غير بالشغل و الاجتهاد و العلم، فاعمل زيه عشان لو حصل و اترفدت الدنيا تتقلب ليك مش عليك.

كانت هذه نظرة خاصة للأمر من منظور إداري بحت، فكما يبدو واضحًا من التحليل السابق أن الأمر لا يتعدى كونه خلاف حول أسلوب الإدارة لثقافة الشركة.